ORATIO I.
O Iesu Christe, aeterna dulcedo te amantium, jubilus excedens omne gaudium et omne desiderium, salus et amator peccatorum, qui delicias tuas testatus esse cum filiis hominum, propter hominem homo factus in fine temporum: memento omnis praemeditationis et intimi moeroris, quem in humano corpore sustinuisti, instante saluberrimae Passionis tuae tempore in divino corde praeordinato.
Memento tristitiae et amaritudinis, quam in anima, teipso testante, habuisti, quando in ultima coena Discipulis tuis Corpus et Sanguinem tuum tradidisti, pedes eorum lavisti, et dulciter eos consolando imminentem Passionem praedixisti.
Memento omnis timoris, angustiae et doloris, quem in tuo corpore delicato ante Passionem crucis tuae pertulisti, quando post trinam orationem et sanguineum sudorem a Iuda discipulo tuo tradebaris, ab electa gente capiebaris, a falsis testibus accusabaris, a tribus judicibus injuste judicabaris, in electa civitate, in Paschali tempore, in florida corporis juventute innocenter damnabaris, veste propria exuebaris, et vestibus alienis induebaris, colaphizabaris, oculis et facie velabaris, alapis caedebaris, ad columnam ligabaris, flagellabaris, spinis coronabaris, arundine in capite feriebaris, et innumerabilibus aliis calumniis lacerabaris.
Da Domine Deus mihi quaeso ob memoriam harum ante crucis tuae Passionem veram ante mortem meam Contritionem, puram Confessionem dignam satisfactionem, ac omnium peccatorum meorum remissionem. Amen.
Pater noster, Ave Maria.
ORATIO I I.
O Iesu mundi fabricator, quem nulla dimensio vero termino metitur, qui terram palmo concludis, recordare amarissimi doloris, quem sustinebas, cum Iudaei sanctissimas manus tuas ad crucem obtusis clavis primo affixerunt, et ad perforandum delicatissimos pedes tuos, cum non esses conveniens voluntati eorum, dolorem super dolorem vulneribus tuis addiderunt, et sic crudeliter te distraxerunt, et extenderunt in longum et latum crucis tuae, ut dissolverentur compages membrorum tuorum.
Deprecor te per huiusmodi sacratissimi et amarissimi in cruce doloris memoriam, ut des mihi timorem et amorem tuum, Amen.
Pater noster, Ave Maria.
ORATIO I I I .
O Iesu coelestis medice, recordare languoris, livoris, et doloris, quos in alto crucis patibulo levatus, passus es in omnibus dilaceratis membris tuis, quorum nullum in suo statu recte permanserat, ita ut nullus dolor similis tuo dolori inveniretur, quia a planta pedis usque ad verticem capitis in te non fuit sanitas, et tamen omnium dolorum immemor, Patrem pro inimicis pie exorasti, dicens: Pater ignosce illis, quia nesciunt quid faciunt.
Per hanc misericordiam, et ob memoriam illius doloris, concede ut haec memoria Passionis tuae amarissimae sit omnium peccatorum meorum plena remissio, Amen.
Pater noster, Ave Maria.
ORATIO I V.
O Iesu vera libertas Angelorum, paradisus deliciarum, memento moeroris et horroris, quos sustinebas, cum omnes inimici tui quasi leones ferocissimi te circumsteterunt et colaphizationibus, conspuitionibus, ungulationibus, caeterisque poenis inauditis te molestaverunt.
Per has poenas, et per omnia contumeliosa verba, durissimaque tormenta, quibus te Domine Iesu Christe omnes inimici afflixerunt, deprecor te ut liberes me ab omnibus inimicis meis visibilibus, et dones me sub umbra alarum tuarum ad perfectionem salutis aeternae pervenire, Amen.
Pater noster, Ave Maria.
ORATIO V.
O Iesu speculum charitatis aeternae, memento illius moeroris, quem habuisti, quando in speculo serenissimae majestatis tuae conspexisti praedestinationem electorum per merita tuae Passionis salvandorum, et reprobationem malorum per sua demerita damnandorum, et per abyssum miserationis tuae, qua nobis perditis peccatoribus et desperatis tunc condoluisti, et quam latroni in cruce exhibuisti, dicens: Hodie mecum eris in Paradiso. Rogo te Iesu facias mecum misericordiam in hora mortis meae, Amen.
Pater noster, Ave Maria.
ORATIO V I.
O Rex amabilis et amice totus desiderabilis, memento illius moeroris, quem habuisti, quando nudus et miserabilis in cruce pependisti, et omnes amici et noti tui adversus te steterunt, et nullum consolantem inveniebas, nisi solam dilectam Genitricem tuam in amaritudine animae suae tibi fidelissime astantem, quam Discipulo tuo commendasti, dicens; Mulier, ecce filius tuus.
Rogo te piissime Iesu per gladium doloris, qui tunc ejus animam pertransivit, ut compatiaris mihi in omnibus tribulationibus et afflictionibus meis corporalibus et spiritualibus, et da mihi consolationem in tempore tribulationis, et in hora mortis meae, Amen.
Pater noster, Ave Maria.
ORATIO V I I.
O Iesu fons inexhaustae pietatis, qui ex intimo affectu in cruce dixisti: Sitio; scilicet salutem generis humani, accende quaeso cordium nostrorum desideria ad omne opus perfectum, et sitim carnalis concupiscentiae, aestum mondanae delectationis in nobis penitus refrigera et extingue. Amen.
Pater noster, Ave Maria.
ORATIO V I I I.
O Iesu dulcedo cordium, ingensque suavitas mentium, per amaritudinem aceti et fellis, quam pro nobis degustasti, in hora mortis nostrae concede nobis Corpus et Sanguinem tuum digne percipere ad remedium et consolationem animarum nostrarum. Amen.
Pater noster, Ave Maria.
ORATIO I X.
O Iesu regalis virtus, jubilusque mentalis, memento angustiae et doloris quem passus es, quando prae mortis amaritudine et Iudaeorum insultatione cum magna voce te a Deo Patre derelictum clamasti, dicens: Deus meus, Deus meus, ut quid me dereliquisti? Per hanc angustiam peto a te, ut in angustiis nostris non derelinquas nos Domine Deus noster, Amen.
Pater noster, Ave Maria.
ORATIO X.
O Iesu, alpha et omega, vita et virtus in omni tempore, recordare, quod a summo capite usque ad plantam pedis te pro nobis in aqua Passionis tuae demerxisti.
Propter latitudinem et longitudinem vulnerum tuorum, doce me, per veram charitatem custodire latum mandatum tuum, nimis peccatis demersum, Amen.
Pater noster, Ave Maria.
ORATIO X I.
O Iesu abyssus profundissima misericordiae, rogo te propter profunditatem vulnerum tuorum, quae pertransierunt medullam ossium et viscerum tuorum, ut me submersum in peccatis emergas, abscondasque me in foraminibus vulnerum tuorum a facie irae tuae, donec pertranseat furor tuus Domine. Amen.
Pater noster, Ave Maria.
ORATIO X I I.
O Iesu veritatis speculum signum unitatis, charitatisque vinculum, memento multitudinis innumerabilium vulnerum tuorum, quibus a summo capitis usque ad imum pedis vulneratus fuisti, et SS. Sanguine tuo rubicatus, quam magnitudinem doloris in virginea carne tua pertulisti pro nobis! Pie Iesu quid ultra debuisti facere et non fecisti?
Scribe quaeso, o pie Iesu, omnia vulnera tua in corde meo, pretiosissimo Sanguine tuo, ut in illis legam dolorem tuum et mortem, ut in gratiarum actione usque in finem jugiter perseverem, Amen.
Pater noster, Ave Maria.
ORATIO X I I I.
O Iesu leo fortissime, Rex immortalis et invictissime, memento doloris, quem passus es, cum omnes vires cordis et corporis tui tibi penitus defecerunt, et inclinato capite dixisti: Consummatum est.
Per hanc angustiam et dolorem miserere mei in ultima consummatione exitus mei, cum anima mea anxiata fuerit, et spiritus meus conturbatus. Amen.
Pater noster, Ave Maria.
ORATIO X I V.
O Iesu unigenite altissimi Patris, splendor et figura substantiae ejus, memento obnixae commendationis, qua Patri spiritum tuum commendasti, dicens: In manus tuas, Domine, commendo spiritum meum. Et lacerato corpore, rupto corde, cum valido clamore, patefactis visceribus misericordiae tue pro nobis redimendis, expirasti.
Per hanc pretiosissimam mortem precor te Rex Sanctorum, conforta me ad resistendum diabolo, mundo, carni et sanguini, ut mundo mortuus tibi vivam, et in novissima hora exitus mei suscipe ad te revertentem spiritum meum exulem et peregrinum. Amen.
Pater noster, Ave Maria.
ORATIO X V.
O Iesu vitis vera et foecunda, memento supereffluentis et abundantis effusionis Sanguinis tui, quem tu sicut de botro expressum copiosissime effudisti, quando in cruce torcular solus calcasti, et lancea militari percosso latere nobis sanguinem et aquam propinasti, ita ut nec minima gutta in te remaneret, et demum quasi myrrhae fasciculus in altum suspensus fuisti, et delicata caro tua evanuit, et liquor viscerum tuorum exaruit, et medulla ossium tuorum emarcuit.
Per hanc amarissimam Passionem, et pretiosi Sanguinis effusionem, pie Iesu, precor te, suscipe animam meam in agone mortis meae, Amen.
Pater noster, Ave Maria.
C O N C L U S I O.
O Domine Iesu Christe, Fili Dei vivi, suscipe hanc orationem in amore illo superexcellenti, in quo omnia vulnera tui sanctissimi Corporis sustinuisti, et miserere mei famuli tui, et omnibus peccatoribus, cunctisque fidelibus tam vivis quam defunctis da misericordiam, gratiam, remissionem et vitam aeternam, Amen.
Crocifisso della Cappella della Basilica di S. Paolo fuori le Mura a Roma, dinanzi al quale S. Brigida ricevette le Orazioni.